錢小豪早前幫新戲《救殭清道夫》宣傳而接受訪問，當年佢套《殭屍先生》，奠定其殭屍片代言人身份。除咗拍戲，小豪喺賽車界都薄有名氣，賽車亦成為佢同細仔穎德嘅共同話題，小豪話：「教佢玩賽車係有私心嘅，想個仔多啲親近自己。」
孖大仔拍片
當年細仔剛出世，小豪返北京做導演，後來老婆帶囝囝去探班時，嚇咗小豪一跳：「送機時佢仲手抱，再見到已經識跑。嗰時好後悔，錯失咗佢嘅童年，所以決定做番演員，唔使拍戲就教佢玩越野單車、游水，總之佢鍾意玩乜都陪佢玩。」近年穎德轉攻小型賽車，秉承老竇嘅興趣，仲玩到頗有成績攞過獎，兩年內由80cc升級到150cc級別。小豪笑言囝囝將來要玩大車都會支持，但要自費，因為咁大個仔冇理由要老竇畀錢。
至於小豪同前妻郭秀雲生嘅大仔龐景峰（前名錢麒夫），近年進軍演藝界，最近喺老竇套網絡電影《生化藥師》演出，小豪話：「佢飾演年輕時嘅我，呢部係佢影壇第一部作品，今次同大仔合作，可以建立番雙方嘅關係同感情，係最大得着，以前兩父子好少機會見面。」
講到近年殭屍片復蘇，小豪話要多得麥浚龍早兩年搵佢拍《殭屍》，因好多人睇完後追番之前嘅殭屍片。小豪話：「之前拍到好抗拒，寧願去台灣拍文藝片，停咗咁多年拍番，原來又可以有新嘢。」仲話為免跟當年一樣濫拍殭屍題材，以後每年最多拍一部。
撰文：馮仁昭