【本報訊】葉劉2003年黑超豹紋裝扮推銷23條的嘴臉，忘了忘不了，「我以前見到佢個樣，都好憎佢㗎」，令沈運龍由憎到愛，全因葉劉的誠意及決心，當他未成為選委、手上未有票時，葉劉已約見講述參選理念，讚葉劉有原則。
身兼香港各界商會聯席會議秘書長的沈透露，聯席過往邀約議員見面談中小企問題，「請佢就好熱心（會到），請其他就難啲」，而葉劉亦明顯了解工商界想法。沈認為她當年敢於為23條立法問責辭職，繼而負笈海外深造，改變自己亦改變別人，決心可見一斑。
票投誰人視乎政綱辯論
相比其他候選人，沈指曾俊華任財政司司長多年未見迎難而上、長期壓抑開支拖慢經濟發展；林鄭一句要延續梁振英的施政理念，「聽完覺得死得㗎嘞……好唔理想」。他對文官做特首有保留，「因為有個通病，文官初期俾工商界睇唔起、未必好尊重佢哋；到佢哋做咗高官特首，就會等同自己係大商家、大富豪」，但指葉劉經過選舉洗禮，縱文官出身亦未見上述通病。至於票投哪位候選人，沈指要視乎政綱及辯論，「因為政綱可以係人哋幫佢哋寫，論壇嘅辯論先至最反映佢哋嘅真誠度。」
■記者許偉賢