香港導盲犬協會早前獲領展捐助，引入「導盲犬本地繁殖計劃」，促進本地導盲犬繁殖同供應，母狗Eve早前生咗7隻導盲犬BB；由於係本地繁殖，領展都想市民多啲共鳴，決定由市民命名，鼓勵大家喺本月16日透過領展「泊食易」手機APP參加改名活動，除咗加深公眾對導盲犬嘅認識，亦可推廣傷健共融理念。
咪以為改名好easy，原來香港導盲犬協會嘅導盲犬幼犬改名有一套規定，首先要以英文排序，以便追查產地及抵港或出身年份，例如呢批狗仔要以「P」字為首，少女熱捧嘅Pandora唔知啱唔啱心水？但改狗仔名都有啲忌諱，好似「Fire」或「Go」等容易令狗隻或視障人士接收錯誤訊息嘅名都要避用，領展最快本月底為七小福嘅名字揭盅。