老友中午聚餐，輪到地產F做東，佢係美食專家，為人又豪爽，識得「應使即使之道」（即係食到靚嘢就唔怕使錢），召集我地去港灣道一號，吃正嘢如江太史家傳菊花鷓鴣羹等等，配以Burgundy靚酒，於是乎大家飲食到面紅耳熱，一齊多謝地產F，佢話：「唔駛多謝，香港咁多事情發生，只令人煩惱，一班老友坐埋有偈傾，已是樂事！」咁又係，外面世界，既有前特首坐監，現特首控告議員誹謗，七警坐牢竟引起捐錢風波，具大律師資格嘅譚惠珠板起塊面話傳媒炒作，難道香港社會已到黑白不分地步？中學生上通識課，真係要有勞老師解釋解釋。
飲得兩杯，可以忘憂，見前賓架W在座，眾人突然想起孫兒孫女入學問題，於是問賓架W：「喂，你係一間國際學校創校主席，搵你介紹入學，有冇辦法？」賓架W耍手擰頭：「我兩年前重任主席，校董會通過，收生必須公平公正，校方不得對任何人顯示優待（favouritism），你地嘅孫仔孫女搵我，一定唔得，條隊有二千人咁多（輪候名單），我點可以出聲呀！」講得好有道理，不過有位心水清嘅財務S就話：「你真係識講嘞，不過我睇娛樂版睇得多，知道有幾位大明星大歌星嘅仔女係貴校學生噃，佢地又點考入去呢？」賓架W幾乎為之語塞：「我要問番校長，在我眼中，在一兩千個三歲兒童中揀幾十人真係非常困難，三歲小童位位活潑可愛，俾我就唔識揀！」
地產F都問埋一份，原來佢有男孫四個月大，兒子已開始為兒子擔心入學問題，搞到地產F都注意到幼稚園小學入學問題。我地話：「你家五代華仁舊生，第六代要入華仁竟然會有困難？」今時唔同往日呢喂，為孫兒入讀幼稚園小學，即使係名人，也要各顯神通，阿爸唔夠面，就勞煩阿爺阿公。左丁山對賓架W講：「一啲津貼學校被殺校，騰出不少空洞校舍，你地不如憑住招牌響，擴大幼稚園小學規模，收多一千個學生啦，橫掂排隊等入學人數有兩千，生意不愁也！」呢間學校確係招牌響，每年都有IB狀元，去年就有兩個，本可去哈佛，但為咗讀醫，都情願留港入咗港大，賓架W都覺得可惜，因外國醫生不可在港執業，叻仔叻女讀醫唯有留港，放棄留學機會。
一位醫學教授同左丁山講過，佢幾想一啲尖子學生去吓約翰霍普金斯呢類大學讀醫科，再回港教學，帶回新知識新技術，可惜呢，本土醫生保護主義就封殺晒呢啲機會咯。