社福界立法會議員「阿臻」邵家臻嘅肥仔社工形象，深入民心，原來佢中學時期，曾經加入學校羽毛球隊，頻頻上陣比賽，更加試過擁有一副鋼條身形，高𥧌時仲有6嚿腹肌……當然，俱往矣！
現年48歲嘅阿臻，細個一家五口同父母及一哥一弟，住喺葵涌石蔭村200幾呎公屋單位，爸爸喺九巴做維修員，媽媽大部份時間做家庭主婦，亦有幫人做鐘點煮飯。父母一直都好錫阿臻，阿臻自從5年前爸爸離世後，至今堅持逢周日陪阿媽飲茶，有時間更會陪阿媽行街市買餸，盡量多啲時間陪佢。
講起童年經歷，阿臻屋企太細，經常喺北葵涌圖書館溫習，有時溫到夜晚10點仲未溫完，惟有留喺公眾走廊繼續溫，溫到凌晨12點鐘先返屋企。做夜更嘅爸爸有次見阿臻咁夜仲未返歸，就上圖書館搵佢，見到佢喺度努力背書，一度老淚縱橫，令阿臻記到𠵱家。
阿臻中一至中五都喺匯基書院讀書，雖然入咗精英班，但當年只有一位同學成功升到中六，阿臻之後轉咗去葵涌裘錦秋中學重讀中五，之後再轉去屯門陳瑞芝中學讀中六、中七，並因喺中七時睇咗導演劉國昌的電影《童黨》，有咗做社工嘅念頭。
黐脷筋俾同學笑
阿臻話讀書期間，各方面都比較慢熱，初中時更因「黐脷筋」問題，過咗一段不斷俾同學嘲笑嘅不快日子，但自中四信咗基督教後，由於教友都好好人、無笑佢，令佢越講越流利，最後仲成為細個諗都冇諗過會做，主要用把口搵食嘅大學講師、文化評論員同埋立法會議員。
佢𠵱家雖然好少返教會，但原來喺立法會發言前，都會先默默禱告，做重要決定前亦會先祈禱。
李八方