就有線的命運，吳天海日前宣佈與之前所有投資者的接洽已經中斷，母公司亦不預備再注資落有線，此話一出，眾心一沉，唔~係啩（Dream Bear語氣），咁正嘅新聞台都放棄？莫非人們都瞎了。
二十多年了，那時網絡即時新聞仲未成行成巿，二十四小時電視新聞僅此一家，要看即時影像新聞根本無得揀，事實是所有傳媒行家公司都裝有線，資源不足那些，更是睇完有線直播當派咗crew，嘻嘻，的確播晒成個採訪喎，sound bite任揀，係冇份發問啫，OK啦。
成長於社媒年代的你也許不知道，當天的有線就如今天的社媒，確曾被質疑有否因對時事太快太真的報道，引起更廣泛的民眾參與，我想當年也不是沒壓力的。當然，到了今天，不只多了多家24小時新聞台，又有網台、網媒、社媒，焦點不會再集中到有線，做不下去照理不會是政治原因，事實是如有任何人還未適應社媒年代的訊息傳播速度和態度，郁啲話人「白色恐怖」，我就覺得那個人好恐怖囉。
唔泵水新聞一出，「首長」趙應春大概覆短訊接電話接到手軟，當日網絡之上惋惜慨嘆之聲不斷，但可悲之處正在這裏吧，嘆息的人中、猛讚有線新聞有幾咁正的人中，有多少仍是有線用戶先？其實有線未死的，吊緊鹽水啫，你們那麼愛它，不如發起另類眾籌，人人坐言起行訂番有線吖，起碼用實際行動告訴潛在買家，有線新聞個brand唔係流嘅。清楚記得，許多年前，某報老總語重心長同Mary講：香港好彩有有線！
同行如敵國，行家都咁話先算啦，香港富豪，諗諗佢呀！
利申：Mary由開台就訂有線到今天，只為一個新聞台，點捨得吖……
彭瑪莉
mailto:[email protected]