旺即係旺，23歲澳洲年輕新星祈普敦，於這天（12日）沙田第八場二班泥地一哩，策大摩馬房田北俊名下馬「人民武士」輕勝，完成個人全日大演帽子戲法。「人民武士」兜兜轉轉返泥地完成今季三捷，今場單Win及組合獨贏A2分別派87及37.5元。
「人民武士」早前由祈普敦打叠贏田草1400米及泥地一哩，之後連輸四場，今日回師泥地一哩，在同一騎師胯下沿途居中，轉彎外叠蝕位仍後上爆半冷得手，輕勝1.25馬位，創出泥地兩戰不敗佳績，亦是本身累積的第六場頭馬。
呢場「人民武士」除了頭馬獎金997,500元外，同時是此駒首勝二班賽，田北俊依例獲發75萬優異成績特別獎金，合共進賬約175萬之多，賽後田少單人匹馬同大摩一齊拉頭馬，冇好似以往咁搵幾個現場馬迷同佢合影威水相。
當大摩被問及對「人民武士」今場取勝的睇法時，他向馬會提出一個建議：「『人民武士』跑泥地比草地好，可惜泥地高班賽不多，我請馬會考慮增加95分或以上馬參加的泥地賽。舉例如果『人民武士』將來有機會遠征杜拜金莎軒錦標，同場很多對手已有熱身，但香港泥地高班賽不多，『人民武士』若未能有足夠熱身就好蝕底。」
第八場二至四名順序為「嘉應之友」、「旅遊首席」及「神舟小子」，四重彩派11萬幾。「人民武士」搭「嘉應小子」連贏着綠燈落飛都有60倍。
講番祈普敦，今午一口氣勝出「大爆發」、「再石磨藍」及「人民武士」，另加第二場「銀城福星」獲季軍及第七場「祥勝駿駒」跑第二名，個人於第八場後累積46分領先騎師王。