離開大台轉做KOL嘅葉翠翠，同老公Raymond(周曉東)婚後兩年即造人成功，更一索得男。葉翠翠不時喺網上分享佢嘅陀B孕記，兼分享佢屋企「大公主」貓貓、「二公主」愛犬嘅生活點滴，當佢哋尤如家人，之不過上月「二公主」一次身體檢查中，獸醫發現「二公主」患上腎衰竭。因為腎衰竭係不治之症，所以翠翠帶住沉重心情，決定帶「二公主」返屋企，一家人陪佢度過餘下嘅日子。
由於翠翠已有7個幾月身孕，要照顧14歲再加有重病嘅「二公主」，一啲都唔容易，見到「二公主」日漸消瘦，又唔肯食嘢，昨日翠翠就有啲脾氣喺微博留言話：「今天激死我了！連大肚媽媽都蝦！。。這個二公主囉，每次食飯都非常唔合作，越來越唔聽話，因她知道我不會鬧佢，(大家睇之前個 live 都睇到她食一啖扭一啖)。現在再過份啲，左邊唧入個嘴右邊滴出來，搞到成個心口都係，好唔中意食。我沒辦法之下叫醒爸爸幫助，然後動也不動食晒呀(爸爸每次出場都是打針，所以好驚爸爸的)。之後仲要同佢洗心口，爸爸見這情況便幫我洗，嚇到二公主洗完都唔敢行。。。然後我幫佢吹乾。」
狗狗冇食慾，身體逐漸虛弱，做主人一定好心痛，或者諗吓另外一啲方法餵食，大肚婆唔好忟，最緊要小心身體呀！