雖然阿仙奴球迷繼續鬧繼續抗議，不過領隊雲格好似借咗聾耳陳隻耳咁，扮晒聽唔到，仲有小道消息話佢會續約兩年留到2019年夏天㖭。話晒啱啱喺歐聯16強俾拜仁慕尼黑大炒10:2，雲格都唔敢再玩嘢，以最強陣容出戰上周六迎林肯城嘅英足盃八強，最後仲大勝5:0晉級。
球迷拉起「WEXIT」抗議
阿仙奴上周二喺歐聯主場反輸拜仁1:5，兩回合合計輸2:10，連續七年喺16強出局。上周六佢哋喺英足盃八強迎非聯賽球會林肯城，賽前同比賽期間都有兵工廠球迷抗議要求雲格落台，有人仲有創意到同「英國脫歐」（BREXIT）拉埋一齊講，拉起寫有「雲格脫廠」（WEXIT）嘅額橫。薑係老嘅辣，67歲嘅雲格一於少理，但話晒球隊啱啱輸大大鑊，所以佢都唔敢出弱陣，以超強陣迎林肯城，當中包括畀喺今季國內外盃賽未踢過嘅門將施治落場。畢竟強弱懸殊，佢哋憑禾確特、基奧特、阿歷斯山齊士同艾朗藍斯各入一球，加埋對手擺烏龍，結果大勝5:0，成功攞到四強入場券。
英國傳媒話，今夏就約滿嘅佢深明如果想留低，就要幫阿仙奴喺英超打入前四兼且捧走英足盃，所以先以強陣迎林肯城。賽後佢仲話炒完林肯城後乜嘢信心都返晒嚟：「我哋近排戰績差，搞到冇晒信心。不過，我哋喺下半場證明咗自己嘅質素，信心亦返晒嚟。」但佢老人家就死唔認技不如人，仲死撐係俾球證吹死先至會喺主場輸1:5畀拜仁：「嗰場波我哋受到唔公平嘅批評，輸波根本唔關球員事。」
名宿爆續約兩年
阿仙奴球迷家陣最關心嘅係雲格走唔走，但佢哋名宿伊恩胡禮就爆料，指雲格因賺錢能力強而可以留多兩年：「阿仙奴會喺一至兩個月內同雲格續約兩年。點解高安基（阿仙奴班主）會炒一個幫佢搵到雙倍錢嘅領隊先？高安基唔會在乎阿仙奴贏唔贏到歐聯或者英超，只要雲格幫球隊入到前四，佢就會收貨。」
另外，曼城同日贏米杜士堡2:0，出線英足盃四強之餘兼喺賽後收到喜訊，皆因佢哋周三歐聯16強對手摩納哥射手法卡奧喺上周六贏波爾多2:1嘅法甲，踢咗25分鐘就因屁股受傷退下火線，可能趕唔切喺周三次回合上陣。