求驗客手記：
藍翼抵港強陣鬥東方

南韓球會水原藍翼（圖）噚日強陣到港，準備周二晚喺旺角場作客對東方龍獅場亞冠盃G組第三輪分組賽，而大軍六點幾就拉隊去小西灣運動場進行適應訓練，操足個幾鐘，備戰咁認真，可能想喺香港開齋喎。

迪高足踝受傷缺陣

水原今季開季唔係好順，亞冠兩戰俱和，韓職又一和一負，今次都唔敢學日聯川崎前鋒咁半力出擊，國腳廉基勳同幾件巴西兵都有隨隊。水原除咗強陣，教練團亦好有份量，徐正源係一代翼鋒，前南韓門將李雲在做守門員教練，但睇佢發福不少。至於東方噚朝喺青衣續操，迪高因足踝傷有到場，但操唔到，肯定周二唔使預，少咗佢同洛迪古斯，對水原得番羅拔圖同米曹兩件外援，但教練陳婉婷就話，既成事實，惟有以可用兵源盡拼，我求大俠一定入場支持你哋。