曾經係梁振英堅實支持者、試過喺上屆特首選舉戰中到「唐宮」外大派「勸降書」嘅前全國政協委員劉夢熊，其後因為行會委任等問題同CY反目，家陣變成反梁大將，呢次特首戰，當然唔會支持有「CY 2.0」之稱嘅林鄭月娥啦！
噚日尖啤出席港台節目《城市論壇》後急急腳走人，原來係要趕去將軍澳工業邨《蘋果日報》大樓，同民主黨立法會議員鄺俊宇、港大經濟金融學院助理講師阮穎嫻一齊喺教協選舉論壇後《花生talk》，同冇票市民一齊剝花生。
「最叻語言偽術」
雖然三位評論員意向未必一致，但問到邊個「最叻語言偽術」嘞喎，就完全冇分歧，一致認定係林鄭，尖啤直斥佢「將一切功勞推畀自己，將一切責任推畀別人」，亦認為佢擺出「君臨天下」嘅姿態，發言已經當成當選後宣言咁。