因俾星如擊中，腹部無法唞氣而倒地落敗嘅向井寬史，前晚凌晨四點喺個人網誌撰文承認「完敗」，同感謝拳迷支持：「返到酒店啦，結果係一場完敗。我由心底多謝所有為我打氣嘅人，特別係所有遠道而來嚟到香港支持嘅人，衷心感謝你哋；亦要多謝枝川會長令呢場比賽成真，我有一個好好嘅經驗，亦已經盡晒力，衷心感謝每一位。」
花絮︰「星」之教練爭亞洲最佳
星如能有今日嘅成就，背後團隊居功不少，好似新西蘭體能教練Ross Eathorne就曾經係競技健美操世界冠軍，佢16年加入「星之團隊」之後，用靜態瑜伽同激烈戰繩等為星如訓練體能。最近Ross更加「教練憑星如貴」，決定參加五月喺新加坡舉行嘅亞洲全年最佳體能教練頒獎禮，仲話星如21連勝嘅成就，令佢好有信心可以贏。
花絮︰姚潔貞睇留言學拳
香港長跑夫妻陳家豪同姚潔貞前晚都有睇網上直播，潔貞話：「其實好多朋友喺比賽未開始前已喺whatsapp談論呢場比賽，整場比賽好正；其實都有贊助商邀請我去現場睇，但同自己跑步班撞咗時間去唔到。」潔貞仲話睇直播都有好處，因為佢唔識拳賽，但邊睇直播邊睇留言學嘢，果然係識睇一定睇留言！佢仲讚星如反應快同打拳時好有型，希望下次有機會一定入場力撐。
