【一周必看】廠迷遊行驚動主席 雲格話去留睇民望

【一周必看】
廠迷遊行驚動主席 雲格話去留睇民望

阿仙奴喺周中歐聯兩回合計慘負拜仁慕尼黑2:10出局,球迷嘅怒火亦不斷升溫,更加有遊行要求領隊雲格即刻引咎辭職。「槍手」上周六晚就會喺英足盃8強主場對非聯賽球隊林肯城,可謂不容有失,雲格喺賽前記招回應去留問題時就話:「(球迷反應)唔係最重要嘅因素,但你當然會加以考慮。我20年來一直努力令球迷快樂,當你而家輸波,我好明白球迷唔開心。」

雲格前途未卜亦搞到球會上下撕裂,連阿仙奴主席基斯域克(Sir Chips Keswick)亦罕有發表聲明,釋除球迷疑慮:「我哋完全了解球隊近期備受關注,亦明白爭議所在。我哋尊重球迷有不同意見,但我哋營運呢間偉大球會,一直以其長遠利益為依歸。雲格嘅合約到季尾完結,任何決定都會經由雙方商討後,喺適當時間以適當方式作出溝通。」