港鐵出宣傳片指揹背囊乘客阻礙其他乘客，惹怒金金大師梁金成，不滿水貨客同內地旅客拖大型行李箱搭港鐵，港鐵卻隻字不提，矛頭反而指向平日揹背囊嘅乘客，噚日以市民身份喺網上發起快閃行動表達不滿，但反應冷淡，只得一位市民撐場。
警方派員監視
人少少，行動都要繼續，佢哋兩人手持「港鐵玩批鬥，背囊客起義，孭嘢就有罪，拖篋就有理」標語走入旺角港鐵站，觸動港鐵及警方神經，派出人員監視兩人嘅行動。
金金大師話，佢細路仔讀書孭嘅書包就係背囊，由細揹到大都咁鍾意，咁多年來經常孭背囊坐港鐵，從來無畀其他乘客投訴。兩人從人流眾多嘅旺角站搭列車到尖沙嘴，大批傳媒追訪拍攝，途中唔少乘客好奇以為發生乜事，兩人抵達尖沙嘴站速速閃人，話以快閃行動結束。