滙控（005）主席范智廉最快今年退休，市場傳過嘅繼任人選，冇十個都有八個，最新一位就係友邦（1299）首席執行官兼總裁杜嘉祺（Mark Tucker）。
杜嘉祺可以話係友邦嘅靈魂人物，當年佢辭任英國保誠（2378）總裁，走過對家做友邦CEO，仲一手將友邦湊到上市。杜嘉祺在位7年以來，友邦每年新業務價值閒閒地都有雙位數增長，可以話係交足功課。
杜嘉祺有咁嘅實力，友邦當年要高薪挖角，出手固之然唔低。睇番最新2016年年報，先唔計股份，2015年度淨係總年薪已經有993.27萬美元（約7,712萬港元）。如果計埋獲派股份，一年人工可以話係天價，有成1.17億港元。
又睇番滙控，同期范智廉2015年度總年薪只有249.6萬英鎊（約2,358萬港元），又冇股份派。上年佢人工仲減咗，得213.6萬英鎊，折合約2,018萬港元。如果杜嘉祺真係過檔，人工分分鐘減一半有多喎。