上周六英足盃八強戰米杜士堡主場對曼城，曼城上周中意外主場悶和史篤城0:0，聯賽唔見兩分，家陣落後榜首車路士成10分，爭標都幾唔樂觀。領隊哥迪奧拿今場就唔敢再輕視對手，派晒阿古路、史達寧同利萊辛尼三叉戟攻堅，中場亦有大衛施華同奇雲迪布尼後上支援，淨打一個防中耶耶托尼，一於大打全攻陣，最後順利贏2:0，殺入四強。
曼城用咗三分鐘就由施華門前建功先開紀錄，哥帥今場用「黃大仙」哥迪奧巴禾把關，好彩呢位智利門將都叫有啲貢獻，上半場救出米堡前鋒基斯泰迪嘅頭槌攻門，下半場藍月再由阿根廷前鋒阿古路建功，最後以2:0輕取對手，順利晉級準決賽，哥帥條氣都應該順番啲喇。