馬德里體育會嘅基沙文盛傳今年夏天轉投曼聯，傳呀傳都傳足大半季，但一直只聞樓梯響。基沙文近日接受法國電視台《La1》訪問時，更向曼聯球迷大潑冷水，話自己聽轉會傳聞聽到厭：「我成日都被問及關於去向嘅同樣問題，越聽越覺得厭煩。我講過好多次，自己喺馬體會同馬德里都過得好開心，呢度天氣好好，我嘅隊友好到你不能要求更多，亦有幸同一位好教練（施蒙尼）合作。我喺度過得好好，冇理由要走。」既然基沙文個電話打唔通，意大利傳媒就浮現曼聯另一位新前鋒人選，就係拿玻里射手梅頓斯，據《Il Mattino》報道，梅頓斯已經同曼聯代表秘密會面，隨時唔會履行同拿玻里2018年先屆滿嘅合約咁話！唔係講笑，梅頓斯今季各項賽事上陣34場入23球，效率仲高過37場入20球嘅基沙文架！缺點係呢位比利時前鋒年屆29歲，比基沙文大4歲。