鄭敬基（Joe）上年5月再婚，54歲的他迎娶年輕19歲的圈外女友Angie Mack，昨日家有喜事，Joe與前妻所生的大仔鄭家揚（JT）在澳洲悉尼大學碩士畢業，他與Angie到當地觀禮，並在facebook貼了多張與兒子在大學影的畢業禮相，Joe打煲呔着禮服，非常重視場合。童顏的Joe與27歲的JT合照甚似兩兄弟，Joe貼了囝囝童年照並留言：「轉眼27載，此時此刻確是喜悅得難以形容。我想起《聖經》一直的教導，『教養孩童、使他走當行的道、就是到老他也不偏離。』」
「喜事陸續有來」
身在當地的Joe昨日接受本報記者訪問時表示：「今年係特別開心，都係屋企人嘅開心事，係一啲好值得驕傲嘅事情，好似阿仔碩士畢業，佢讀物理治療，喺畢業禮聽到主席話呢個科目喺今年拎咗全世界排名第一，覺得冥冥之中，主係看顧我個仔嘅前途。」Joe笑言兩公婆做代表出席：「功勞唔係自己，我只代表家庭，佢媽咪同妹妹都喺多倫多，託我同Angie喺香港過嚟。」鄭家喜事陸續有來，其細女將於今年6月畢業，大仔8月返多倫多結婚。
「諗番起佢細個」
見到大仔學有所成，Joe感觸地表示：「我由落機嗰一刻，諗番起佢細個騎上我膊頭，到今時今日已經可以獨立生活，我嘅心情係交畀我相信嘅主耶穌，相信佢會繼續日日照顧我個仔嘅前途，神亦都畀咗一份最好嘅禮物我，就係阿仔完成佢嘅學業，再踏入人生另外一部份。」
採訪：唐琛悠