【本報訊】見過施志明兩次，兩次都是三件頭西裝。「有時做完嘢太趕，着住西裝上山考察」。他是香港史專家，珠海學院最年輕博士畢業生，《本土論俗》作者，同時是保險從業員。7年教學生涯，由村校、官津、私校到直資學校。「無休止嘅殺校縮班，我睇到個趨勢」。放下教鞭，卻毋忘授業解惑的初衷，堅持公餘義務帶導賞團，出版研究。人生難盡如人意，但他說只要努力總有路走。
記者：呂麗嬋
33歲的他，是罕有年輕的香港史專家，傳媒找他解構農曆年宜忌；新近出版的港史專著，就主力研究新界四大民系。「其實係我嘅論文，有關開埠前客家、蜑家、圍村及鶴佬嘅風俗。2012年，時年28的他博士畢業，新書修訂一拖數年，怎想到恩師上年初猝逝，成為無可挽回的遺憾。
憾恩師猝逝 無法見證著作
「好突然，11月同老師去研討會，3月已不在」。施志明的恩師，是台灣著名歷史學家胡春惠教授。胡老是研究中國近現代史的權威，在國民黨黨史會身居要職，也是台灣國立政治大學歷史研究所所長，退休後來港，與這個與台灣命運相連的小島，結下不解緣。「得到好多老師指導，一直好感激，如蕭國健教授（研究香港史專家）；去研討會，胡教授嘅指導，畢生受用，佢亦係我嘅口試導師」。一代學人去年初回台投票，原擬回港最終卻長眠故土，施謂老師為人謙厚，關心學生，是他永遠的恩師。
像大部份年輕人，因為愛打機，迷上三國，誰想到有趣的遊戲，竟成為他醉心研究歷史的起點？「想知來龍去脈，就去圖書館借好多書嚟睇」。同代的80後，三國誌、大航海時代，甚至成吉思汗，都是陪伴成長的網絡遊戲。「歷史係從遊戲灌輸喺你腦入面，細個嘅呢種培養，對我影響好大」。生於基層家庭，父親是廚師，為口奔馳，中學跟隨兄姊讀職業先修，預科讀理科，到考進珠海學院，讀的卻是中文系。「我讀書係晚成，到讀大學，先知自己真正興趣」。遲熟遲勇，2005年珠海畢業，7年間以半工讀方式考獲碩士及博士學位，還有教育文憑。
「第一份工喺村校教，沒一年就殺校」。他教過Band 1官津、私校，也教過即將轉直資、按額收費的中學。「面對殺校縮班削資，好無力……僧多粥少，大學學位越來越多，讀中小學嘅人越來越少」。新入職的合約老師成常態，有老師為保教職自願減薪。選擇無對錯，自言有家累的施志明說：「我當時考慮嘅係：撇除學歷，自己可以駕馭咩行業？點樣先可以維持到家庭嘅責任？」
2012年，爸爸過世，他決心撇開學歷的包袱，由零開始。「嗰時搵咗個師兄傾，佢問我係咪一個迂腐嘅人，因為從商同做保險，都唔需要好高學歷」。古有進士從商，今有博士下海，有人慨嘆博士何價，他卻以平常心處之。「我會問自己，呢個行業，係因為高學歷令你覺得可恥，定係搞唔掂生活，要靠屋企人要朋友接濟更可恥呢？」
身處迷惘失落的年代，年輕人很躁動，難以安居；就算高學歷，求職一樣處處碰壁，他是過來人，亦師亦友的關係，細水長流。「《紅樓夢》入面有咁樣嘅一句：世事洞明皆學問，人情練達即文章。點樣利用你學到嘅嘢，去駕馭你嘅人生，呢樣嘢，係人生之中，或者先最重要」。
堅持公餘義務帶學生導賞團，參與古蹟講座，他對香港史的研究熱情，亦無因「不在其位」而冷卻。「新近喺保良局發現有一批紀錄，係戰前經香港到新加坡華僑嘅口供紙」。都說中國是走難的民族，父親是印尼華僑的他，打算自資開展有關研究，不希望這段華僑逃難史最終被湮沒。
「就算唔係喺大學、就算申請唔到研究經費，如果有興趣，一樣可以做研究」。訪問後的周日，將到新加坡翻閱檔案的他說。
