新民黨葉劉宣佈棄選特首10日後，噚日就約傳媒茶敍，一邊飲住杯「有奶冇糖」咖啡，一邊講自己感受。葉劉話，棄選後西環冇正式約會自己，但送上安慰嘅人唔少，其中佢特別感謝一直盛傳力挺奶媽參選的「老董」董建華，老董仲特別叫葉劉唔好bitter！
葉劉話老董喺佢棄選後特別約佢見面，不但打咗幾次電話畀佢，仲搵佢食飯，葉劉話︰「佢（老董）話我好有鬥志，話『你唔好灰心呀，唔好bitter呀』咁」。八方想知董建華有冇叫佢改撐奶媽，葉劉即話「冇冇冇冇冇」。
藉港視寸奶媽冇承擔
雖然葉劉冇得參選，但唔代表佢嚟緊冇角色，今個月18號，佢個新民黨就會搞場座談會，邀請奶媽、薯片同胡官先後出席回答問題。葉劉噚日講明，自己唔會公開投畀邊個，話要尊重暗票制度，亦不會綑綁新民黨選委投票。
棄選後自稱「一場辯論都冇睇到，因為自己好唔得閒」嘅葉劉又話，唔少電視台都邀請佢做評論員，但佢擔心評論完之後，「又俾人話我酸葡萄」，所以要好審慎咁行事咁話。至於三名候選人表現，葉劉就話︰「一個係棟篤笑，一個有親和力但冇乜內容，一個就熟書但好官僚。」
早前因為689讚奶媽「有承擔」而落淚嘅葉劉，對奶媽聲稱港視發牌事件事不關己嘅說法特別上心，批評「典型官僚答案」，話奶媽身兼行會成員「有份落鎚」，唔可以話自己冇責任，強調自己當時都係行會成員，「我就有份撐政府，呢啲就叫做承擔嘞」。
李八方