逾百名市民昨午在金鐘添馬公園集會撐警，主要以是中年人士，部份操普通話。其後數十人到政總東翼前向政府代表遞交請願信。
張女士指，到場是因「有人叫我哋嚟」，又說因有親戚是警察，故支持七警，親戚亦吿訴她同袍知道判刑後都感失望，「覺得做咗好似好唔值，雖然係幫香港，但份工點解會咁呢？」沒有看過判決書的她認為，七警判刑兩年太重，應該要上訴，「（七警）可能太過激動囉，食都冇餐好食，又冇得休息……要發洩下咁」，但她指，警察私下向市民發洩亦不對，應交由法律處理。
另一自發到場撐警的張太認為，七警案判刑太重，「應該『係咁易』幾個月囉」，雖然打人不正確，但七警只是「一時大意，做咗少少錯誤」，所以支持七警上訴。
Elisa則稱，支持七警和就辱警罪立法，希望法治精神能夠伸張正義，「唔希望正義嘅警察係畀到咁嘅判決」。被問到為何要就辱警罪立法，「咁深入嘅我可能遲啲先答你呢個問題…我唔想咁公開答你，要有返一個程序」。至於七警打曾健超的行為是否正確，「我唔係答你，你依個係引導性錯誤」。
黃先生支持辱警罪立法，認為佔中時警察受盡屈辱，對警方不公平，「以國際標準嘅慣例嚟立辱警罪」 ，如沒有辱警罪，示威者會變本加厲。他說，七警判決過重，「如果佢判兩年監禁，咁掟磚頭嗰班要判幾多年呢？」，認為執法人員知法犯法是絕對不恰當，應要譴責，但希望法庭以劃一標準處理案件。
政府紀律部隊人員總工會亦發表聲明，指近日有立法會議員和政界人士等，公開地在無證據及純粹猜測的情況下製造新聞，並對紀律部隊人員作出失實的誣衊。