薯片叔叔同奶媽噚日除咗喺記協論壇過招，亦各自喺facebook隔空呃like。前日應邀拜訪葵青迦密愛禮信中學嘅薯片叔話，聽咗前線教育工作者同學生對教育嘅親身感受，其間仲同學生撐枱腳，食咗該校學生餐之一、由小食部提供嘅豬扒飯。薯片叔叔話，自己政綱已提出一系列理念同方法回應師生訴求，認為政府未來可作恰當調整及傾斜，令各區學校都有發展前景，學生獲得更理想教育。
奶媽噚日亦唔執輸，趁前日坐渡海小輪返灣仔競選辦時拍片，話自己喺告士打道長大，見證一次一次填海，為香港提供土地，建立今天金融中心。奶媽話，接落嚟嘅工作係美化維港兩岸，「還港於民」，話如果有機會擔任下一屆行政長官，會推動成立「海濱管理局」，「以更多姿多彩的方法，讓市民和遊客享用具吸引力、交通暢達及可持續發展的世界級海濱」。
奶媽搭渡輪都吸嬲
但網民似乎唔太受落，除咗如常畀「嬲嬲」最多，唔少網民亦狂鬧林鄭當年清拆皇后碼頭，更有網民留言：「與民共議？西九故宮博物館你與民共議了嗎？全民退保你又與哪個民共議了呀？」
