Onkyo收購Pioneer後，都仍然有用Pioneer品牌推出產品，但通常兩個品牌唔會重疊產品線，但好似最新在日本發佈DAP時的「一雞兩味」例子就比較罕見。今次所發表的兩款新輕巧DAP，無論是Onkyo rubato DP-S1或者Pioneer Private XDP-30R，基本上是同一部DAP，只是換上不同外形設計、不同介面同品牌名稱，唔知Onkyo此舉是否想測試市場對兩個品牌的反應再釐定以後的市場計劃。
兩部DAP機身尺寸都只有63x94x15mm，同以原塊鋁材切割而成並配備2.4吋觸控式屏幕；銀色設計的Pioneer XDP-30R機身邊緣用上斜面設計並配合較小的音量旋鈕，而黑色設計的Onkyo DP-S1就比較似之前的DP-X1。特別之處是兩部DAP都搭載雙ES9018C2M DAC芯片，並對應192kHz/32bit PCM以及DSD 5.6MHz，機上亦搭載2.5mm平衡輸出插頭，在內置16GB儲存外可另加兩張microSD卡擴充容量至最高416GB。哪一款比較好聲或好用就暫時未有答案，但從定價方面都或多或少睇得出哪部較「高級」。Onkyo DP-S1市場售價約45,000日圓（約$3,034），而Pioneer XDP-30R市場售價只約40,000日圓（約$2,697），而事實上兩部DAP定價都算幾平幾抵用，跟國產品牌DAP售價已相差唔遠。
資料來源：ITMedia
文：布偉倫
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily
