廉政專員白韞六（圖）噚日同傳媒會面，講到梁振英UGL事件，佢就唔肯透露案件內容，但就話自己跟得好貼，冇任何拖延，又話廉署所有案件調查進度良好。講到梁振英因為UGL事件向傳媒同立法會議員出律師信，白韞六就話係其他人嘅事，唔方便講咁多，但佢聲稱CY冇過問過單案嘅進度，又好肯定話就算佢問，自己都唔會講。佢仲同八方講，即使調查對象係政協，廉署嘅調查都唔會受影響。
6月約滿 拒透露去向
舊年廉署人事風波搞到一頭煙，白韞六話𠵱家內部士氣好好，佢成日會同同事溝通，佢仲主動提起李寶蘭「劈炮」單嘢，佢話外界都懷疑𠵱件事係同調查UGL事件有關，知道嘅人就會覺得好好笑，一個人點影響成件案嘅調查，又話如果有同事受壓力做唔正當嘅事，佢自己都會舉報啦！
早前有傳白韞六6月底完約後會唔撈，佢噚日話自己喺廉署打工好開心、好有滿足感，至於係咪真係唔續約，佢就話到時先算啦，又話自己暫時未有任何大計。至於有傳入境事務處前處長陳國基會接棒坐佢個位，佢就話唔想評論，睇嚟都係要等到6月先知結果！