面對寒冷天氣同熱血球迷嘅戰鬥民族式冰火款待，曼聯周四喺歐霸盃16強首回合經過3,700公里長征作客「俄超李城」羅斯托夫，憑米希達利恩休戰兩星期復出後隨即取得入球踢成1:1，次回合回師主場有一定優勢。
相比上仗主場1:1賽和般尼茅夫嘅聯賽，曼聯領隊摩連奴作出7個調動，只有伊巴謙莫域、保羅普巴、馬高斯盧祖同菲爾鍾斯繼續擔正，至於羅斯托夫就有「伊朗美斯」阿斯蒙先列後備。紅魔喺35分鐘開紀錄，費蘭尼左路接應長傳心口控前，斜線交畀入楔嘅伊巴謙莫域，後者再地波傳畀無人看管嘅米希達利恩輕鬆射入，兼取得重要作客入球。不過，羅斯托夫喺53分鐘扳平，前鋒布卡洛夫接應右閘卡拉卓夫妙傳突破越位，一控一射攻破曼聯門將羅美路十指關，雙方餘下時間再冇入球，首回合各一言和，次回合下周四返奧脫福再戰。曼聯大軍亦睇怕要快啲返英國，因為佢哋下周一就要出戰英足盃8強作客車路士啦！