3位特首候選人噚日前後腳現身記協座談會，雖然唔係同台較量，但睇住佢哋隔空放箭都幾過癮。不過原來差啲因為記協甩轆，搞到胡國興（圖中）放唔成佢支暗箭。
話說噚日胡官喺開場白已經大拋金句，話現屆政府橫洲縮水、小朋友飲咗鉛水、有啲合約唔使做嘢都可以收水，擺明係暗寸特首梁振英啦！跟住又大賣口乖，話司法獨立係香港最後一道防線，而第一度防線呢？之唔係新聞自由！因為新聞自由令不公義嘅人同事無所遁形。之後佢再批評現屆政府推政改失敗，令香港浪費5年，下屆政府肯定要面對議會內外嘅反對，變成「跛腳鵝」。呢隻「鵝」怕且係講緊對手林鄭月娥啩。
答咗一堆問題之後，記協就多謝胡官請胡官離開，準備下一位候選人曾俊華入場。但原來胡官準備咗總結發言，而佢呢篇有備而來嘅總結發言，先至係對準成日搞吹風會嘅林鄭所發射嘅暗箭，如果佢呢支暗箭射唔出，可能就冇後來林鄭被追問吹風會嘅問題，亦因為胡官有做總結，之後出場嘅林鄭同曾俊華同樣可以做總結發言。