麥記啱啱先公佈The Signature Collection系列漢堡啫，板燒雞腿包、足三両、至尊漢堡三款包話咁快偷偷哋喺餐牌「被消失」。網民怒氣沸騰群插麥記，反對將三款包下架，有啲仲激動到話罷食新包㖭。
爆粗嗌罷食
有網民喺麥記facebook專頁不滿咁話，周三上網訂板燒雞腿包、至尊漢堡、足三両都話有，臨送餐嗰陣先覆電話話冇得賣；麥當勞喺fb仲回覆話「不時會更新餐牌，為顧客帶嚟新嘅選擇」，反建議顧客試三款Signature Burger喎。
網民就唔係好受，爆粗話好鍾意食板燒雞腿包「走醬」，喺減肥恩物，「成間M記最X好食就係板雞喎，冇X嘢呀」。群情洶湧，講到罷食咁大件事，八方撥過輪問吓麥當勞；麥記回覆承認暫停至尊漢堡等三款包，但會繼續觀察市場反應同埋聆聽意見，適時調整餐牌喎。咁你哋聽到巿場聲音啦！