前歌手黃寶欣早前宣佈結束婚姻，回復單身的她再闖商界，與友人合資在九龍城開餅店，雖然開店只短短時間，但已吸引大批捧場客，不少圈中名人亦輪流幫襯，發哥周潤發及發嫂、任達華都是常客。
獲讚善心老闆娘
店內主打的蛋撻賣10元一個，對一些基層市民來說，吃一個蛋撻可能已是奢侈事，甚至是一頓飯的價錢。日前有讀者向本報爆料表示要表揚老闆娘黃寶欣一件好人好事，大讚她做生意不只是樣樣講錢。讀者文先生透露：「有日下晝3點幾特登走落去幫襯，個個等出爐排長龍，排喺我前面係個阿伯，攞住成堆『神沙』（散銀）排隊。」
文先生憶述當日情境說：「本來我想同阿伯講，好多舖頭唔肯收毫子，不如我同佢換啦，但未講就已經到阿伯買喇。黃寶欣見到阿伯攞住成堆散紙，數完之後就去包咗個蛋撻畀阿伯，仲同阿伯講：『哎吔，呢個撻做得好似唔夠靚呀，伯伯我唔收你錢喇！』」文先生指當時聽到都好感動，覺得香港人那份情仍然存在，大讚黃寶欣做得好。
「鍾意同客溝通」
本報昨日聯絡黃寶欣，問及送撻事件，她笑說：「係早前嘅事喇！我記得嗰日個伯伯仲係震吓震吓咁行，我見到佢排隊咪問有乜幫到佢囉！知道佢想買蛋撻，咁我就送咗一個畀佢食！」提到有讀者大讚她，黃寶欣感謝說：「其實都好小事，但我真係好鍾意同啲客人溝通吓！」
採訪：小米