香港回歸20周年，一年一度喺維園舉行嘅香港花卉展率先打響慶祝活動第一炮，康文署特別喺場中炮製一個3層高嘅生日蛋糕花藝擺設贈興。
花卉展即日起至19日舉行，今年以玫瑰為主題花，以「愛．賞花」為主題，但唔知係咪受天氣影響，部份玫瑰花等鮮花已經枯萎，康文署話會盡快執番靚。
菲律賓show習近平海報
今年花展展出超過35萬株花卉，包括約4萬株玫瑰，有17個國家參與，其中參展嘅菲律賓製作咗張總統杜特爾特（Rodrigo Duterte）同國家主席習近平握手嘅巨型海報示好。康文署則以「玫瑰．情真」嘅4朵玫瑰花造型為中心，環繞玫瑰雕塑有4個咖啡杯，盛載鮮花堆砌嘅愛情鳥同歡樂家庭。
除咗14,000株鬱金香嘅花海，今年仲有賽馬會以遊樂園為主題嘅花藝旋轉木馬及摩天輪等機動遊戲。署方估計今年吸引逾50萬人次入場賞花，並特別喺晚上安排燈光匯演，園林美景結合燈光同音樂效果，等參觀者夜遊花展。入場費14蚊，學生、長者優惠收費7蚊。詳情可到康文署網頁 http://www.lcsd.gov.hk/tc/hkfs/2017/ 。
