車婉婉同老公Jonathan嘅愛情結晶品下個月出世，已經宣佈陀B仔嘅婉婉，早前搵咗肚皮繪畫師Fiona喺肚皮畫畫。婉婉話：「呢個叫baby bump painting，其實喺外國都好流行嘅，之前心大心細，因為冇朋友試過，到6個幾月大，忽然記起Fiona問過我有冇興趣，於是就約佢傾，了解晒肯定顏料對BB一啲害都冇，咁就決定畫。」
自細鍾意
問婉婉點解會揀畫Snoopy？佢話：「繪畫師問我想畫乜，我一直都好鍾意Snoopy，細個直頭搵老公都想似Snoopy，所以我覺得老公都有啲似。」婉婉又話一般孕婦都喺6個月左右畫，但佢個肚比較大，相信因為飲得多湯水，所以繪畫師都要加大幅畫嘅比例。
不過，肚皮手繪畫影完相就要清洗，好少保留過夜，婉婉話：「係好唔捨得㗎，所以繪畫師教我用紗巾將圖案印喺紗巾上面留念，我照住做都成功咗，咁第日就可以畀阿仔睇番，話佢知佢未出世嘅時候，Snoopy就喺佢上面喇！」
撰文：馮仁昭