【本報訊】由屋邨打拼到變連鎖粥店老闆的蕭楚基坦言，多年來經歷香港好多周期起落，但只有一個「頭痛問題」令他最痛苦，就係有工無人做。逆市密密開舖本是開心事，蕭楚基卻對記者大呻「好痛苦」，皆因人人以為餐飲業最慘係業主加租、食材貴，但事實上食材近年都好穩定、每年只增加單位數，租金亦已見回落。
相反，招人才令他最頭痛，皆因近年公司多聘請已獲單程證女性工作，但過年最繁忙期間她們卻要回鄉過年探親，令人手大為短缺，「已經唔係畀最低工資，兼職畀到（每小時）50、60蚊，都好難搵人」。
他舉例指，因農曆年係餐飲業生意最好時間，像旗下的東港城新分店原計劃農曆年前開業，更辛辛苦苦叫裝修師傅幫公司趕工，但最終卻因無人開工而被逼延後開業。
為了應對此狀況，公司決定只要新店面積達二千平方呎，便會轉行快餐店式的自助服務，「唔係想慳人手，但又真係慳到至少六個」。按現時海皇一名店務助理月薪近1.5萬元計，變相已慳足9萬元。