香港自從有咗Art Basel，每年3月都變成藝術之都，各大商場、展覽場地都有藝術活動，九倉（004）旗下銅鑼灣時代廣場Living Room Museum今年就難得舉行「畢加索與積琪蓮」展覽，展示畢加索13幅晚年作品。
時代廣場係跟西班牙巴塞隆那畢加索美術館合作，據講籌備超過3年，難怪九倉副主席李玉芳以攀山涉水去形容呢次籌備工作，佢又話，以後都會繼續舉辦同類藝術展，並且維持免費形式，以增加文化元素。
除時代廣場，中環置地廣場亦曾經舉辦藝術展，免費展覽名家畫作。一般而言，呢類展覽可以帶動人流，對於商戶生意額提升多少，則較難統計，只可以話，brand building呢東西同藝術一樣抽象。