日聯球會鍾情巴西外援，不過橫濱水手今季卻向歐洲埋手，從貝爾格萊德紅星簽入了葡萄牙前鋒曉高韋拉及馬其頓中場大衛巴賓斯基，兩人亦表現對辦，過去兩輪聯賽總共入了四個入球。
司職進攻中場的大衛巴賓斯基乃巴塞隆拿青訓出身，故波底甚好；這名馬其頓國腳由貝爾格萊德紅星轉投水手後，火速融入球隊並負責中場領軍，而且於對上兩場聯賽攻入兩球，協助球隊開季兩戰全季。至於同樣來自貝爾格萊德紅星的曉高韋拉，雖然暫未能搶到正選，不過發揮後備殺手本色，同樣兩場聯賽入兩球。
另外，升班馬大阪櫻花亦搵歐洲外援，從韓職球隊仁川聯簽入了身高達1米87的克羅地亞中堅馬迪莊積。神戶勝利船亦落實簽入德國前鋒普多斯基，後者將於今夏正式加盟；消息指雙方簽約兩年半，普多斯基的年薪達9.1億日圓（約6,150萬港元）。
文：青蛙仔
