每逢3月兩會期間，大批身兼人大、政協嘅立法會議員要北上開會近兩星期，所以立法會都索性休會，唔少議員趁呢個空檔唞唞，留港休息或外遊充電。公民黨陳淑莊就趁同事空群上京，立法會冇乜會開，趁機飛一轉伊朗，見識吓波斯風情。
八方聽聞Tanya此行都一如以往，冇乜事前準備，幾乎喺飛機上先plan行程，好鬼即興。但因為入鄉隨俗，知道婦女要披頭巾，所以佢就一早預備好，佢抵埗後喺facebook留言話，日日披頭巾，搞到有啲神經緊張，因為佢成日都要留意：條頭巾到底有冇包到冚？亦唔好露出一截手臂肉。
而食嘢呢，當然係Tanya嘅主打，佢話已經試咗羊頭湯，yummy yummy！當地人原來好鬼nice，仲有對當地人夫妻請咗Tanya去佢哋屋企坐㖭呀。