近年唔少政商界名人二三代，都好積極投入社會事務，好似身兼旅發局主席嘅麗新系主席林建岳嘅三女林顥伊，除咗加入爹哋任監事會主席嘅經民聯，亦創辦咗Paws Hero（動物英雄聯盟）。係乜東東呢？查實係保護動物權益嘅新組織，以拯救動物為宗旨，希望個個人都成為「動物英雄」。
顥伊上月已經出動，聯同一眾Paws Hero去東涌，原來係見東涌警區指揮官同前線警員，多謝佢哋喺「人獸交」案件迅速破案，同時希望政府重視動物基本權益，加強對虐待動物嘅執法。
嚟緊星期日（12日），顥伊又同Paws Hero出動，喺旺角麥花臣球場同香港寵物福利協會合辦動物嘉年華會，香港導盲犬服務中心等組織亦參加，經民聯青委會則係支持機構。據知當日現場活動包括犬隻服從示範、導盲犬領路體驗以及狗狗玩樂區等，顥伊希望多啲人參加，加強推廣動物權益。查詢電話：2310 9988。