說好的12場聯賽全勝呢？曼城領隊哥迪奧拿啱啱先講完，要贏晒餘下12場聯賽先追到無人能阻嘅車路士，點知周三英超獨腳戲主場對史篤城，全場12次攻門只得1次中目標下，最終雙方踢成0:0，「藍月亮」爭標遭遇重大挫折，並間接令車路士鞏固10分榜首優勢！
哥帥呢場畀近期狀態大勇嘅史達寧休息，改派捷西斯拿華斯擔正，夥拍奇雲迪布尼、利萊辛尼同阿古路攻堅，點知全場最有威脅射門竟然係史篤城前鋒馬美迪奧夫開波5分鐘近射俾曼城門將韋利卡巴尼路擋出……反觀曼城進攻球員表現啞火，到72分鐘先有似樣攻門，大衛施華同費蘭甸奴撞牆後左腳施射柱邊出界，3分鐘後呢位西班牙中場禁區外遠射再度斜出，加上奧達文迪其後角球頂高，註定曼城無法攻破史篤城大門，兩軍踢成0:0；曼城錯失升上次席機會，27戰得56分續居第3，落後榜首車路士10分，史篤城28戰36分繼續排第10。