曾經話過自己嘅中間分界係市場定位嘅顧修全，髮型多年來都係中間分界，後來變成all back頭，感情經歷亦翻了幾翻。
顧修全第一任妻子，係細佢兩年嘅著名心理學家孫天倫。兩人77年在懲教署工作時認識，顧曾戲言一個係「監獄奇女子」，一個係「監獄奇男子」。當年兩公婆仲拍住上一齊開傳銷中心，又辦心理技巧課程，教人「自我創富」、「超級推銷」。當時係1993年左右，一個course四堂，學費$1,200；有啲課程分三日共16個鐘，學費收$3,100，每班收40人。兩公婆賺到第一桶金。
顧修全與孫天倫離婚後，生意亦隨之結束，更曾傳欠債千萬。04年他接受專訪時曾承認當年離婚，錢銀問題是原因之一，但唔係主要原因，更稱此事令他有一個很深刻感受，就係「冇面」，因為覺得自己係心理學家，但能醫不自醫，覺得愧疚，更形容為「生命中最大危機」。
至於當年的金錢問題，顧修全解釋係因為當時婚姻出現問題，生意拍檔——亦即是孫天倫決定不再做落去，顧稱：「佢唔做，我都唔知點算。」
顧修全第二任妻子，係佢離婚後開嘅心理培訓中心助手林璻鈴。嗰陣顧修全好不容易由人生谷底爬番起身，時維2000年底。當時顧修全唔止搞起中藥偉哥，仲開埋心理培訓班，收入相當不錯，顧修全亦不諱言，目標係賺過10億：「我要賺好多好多錢，心理學係好powerful嘅工具。一個人喺社會上掂唔掂，衡量嘅尺度就係錢。」
不過顧修全同第二任太太最後都係離婚收場。據知依家顧修全感情生活並不空白，去年曾有傳媒影到到佢同一名目測年約三十歲、細過顧博士一半嘅女伴十指緊扣行超市買餸，非常甜蜜。