下星期一有場英足盃八強大戰，車路士鬥曼聯，嚟緊有咁大場波，點可以唔寫吓！最近有個坐咗好耐板凳嘅車路士球員慢慢搶番個正選，就係西班牙中場法比加斯（圖）。
車路士領隊干地鍾意3-4-3陣式，屬意尼高路簡迪同埋尼曼查馬迪兩個好搶得嘅球員拍檔踢防中，結果法比加斯被邊緣化大半季；仲諗住法比仔喺車路士嘅日子進入倒數之際，最近三場突然搶走咗馬迪嘅正選，拍住簡迪打中場。
法比喺數據上，佢極高效。今季法比有三個英超入波，仲有七次助攻，加埋直接為車仔製造咗10個入波，除番上陣時間，法比每隔73分鐘就可以為車仔製造個入波。唔好以為法比懶，佢喺對韋斯咸場波嘅跑動距離有12.7公里，仲多過出名跑得嘅簡迪。
有法比喺度，車路士嘅進攻可以轉一轉模式。馬迪拍簡迪嗰陣，佢兩個都係駁腳多，任務係令個波盡快通過中場，交畀夏薩特發辦，配合翼衞進攻。有法比的話，車仔嘅一對翼衞就冇壓得咁前，改由法比用長傳運波上去，加重中路進攻。文：咖喱