雷神莫雷拉最近多咗個朵叫「早糊王」，顧名思義，係指佢早段場次枕住有馬贏。事實的確如此，呢位神級騎師繼剛周日八捷破香港紀錄後，今晚（8日）快活谷一開場又贏，佢以新座騎「金剛秀」勝出頭場五班1200米，單Win及組合獨贏A1分別派19及16.5元。
來自徐雨石馬房的「金剛秀」現年四歲，之前13戰最叻第二未贏過，呢鋪一搵雷神幫手即有耳目一新表現，1檔起步沿途前置守靚位，直路移出中叠一加速即拋離所有對手，輕輕鬆鬆以2.75馬位之先衝線，打開服役勝利之門，雷神亦再一次為五班未勝馬開齋，認真能人所不能，不愧為「五班處女馬救星」。
與此同時，莫雷拉季內暫四次騎徐雨石賽駒出戰五班，成績三贏一輸，勝出率剛好七成半，數據相當突出。
徐雨石指「金剛秀」今仗贏在莫雷拉出色的發揮，石哥話賽前看眾駒行圈，已覺得「金剛秀」全場最靚，他搵莫雷拉騎可減少陣上犯錯，直接增加爭勝機會。
頭場賽果熱頭冷腳，二至四名順序為「飛霞」、「衝鋒友」及「你同我定」，四重彩派三萬蚊鬆啲。「飛霞」騎師杜利萊傷癒第一擊做二奶，未能夠第一時間重響勝鼓。