點樣可以令特首選舉走樣，變形？立即變形，唔好再三幅被，因為再loop三幅被，市民未被西環整死前會被悶死！悶死！悶死！
林鄭咁打得，即刻做變形金剛，變咗男人，無兆波包袱，身段勁好多，絕對擺脫2.0的惡狼附身。能夠助林鄭變身的是無咁奸的陳智思，可能是少鹽少糖的關係，陳智思比湯家驊「似返個香港人」。林鄭從曾營挖將，卻求其擺陳落保鑣名單，由他去擋格示威請願，是殺雞用了牛刀。
林鄭金剛不壞，唔再暗寸鬍鬚搞禍美食車。這時候鬍鬚全面以武會選委，示範世遺絕招中華武德。政綱得把口，但武學招式深奧，雖然個個跟住耍，有人升呢做到一代宗師有人走火入魔淪為岳不群，就係歸因良心走樣！變形！劍在人在，荷槍者受黑社會獻金已經摧毀香港形象，唯有靈劍老神在在，能挽回市民殘缺的信心。鬍鬚劍師，論壇被窒的話，以劍道神回就得！最後是胡官，是三人中最識靈活走位的周伯通，但時不我與，必須再下一城變鐵蛋，彈向林鄭的靠山張小明！砌低高牆！