700億唔夠嘅主板成交，只足夠撐起兩個sector喪炒，一個係內房股，一個係汽車股，不過，既然氣氛返咗嚟，短線資金重返市場，就遲早將炒風蔓延到其他sector。
揀股方面，睇完吉利（175）單日爆升8%之後，就知道揀強勢sector之餘，仲要揀裏面最強嗰隻，嚟緊相信快將到玖龍紙業（2689）爆上。
玖紙主席張茵舊年12月頭留低一句「庫存海嘯後首次降至5天」，已經話畀大家聽股價遲早破頂。結果今年2月下旬公佈，截至舊年12月底，玖紙半年純利按年增長51.4%，銷售額升，毛利率升，盈利因此大升。股價由7蚊邊升到10蚊，創6年新高，合理不過，因為公司正步入6年來最好環境。勁就勁在，競爭對手理文造紙（2314）公佈同期盈利增長只有18%左右，證明玖紙表現勝同業，市場最喜愛玖紙呢種鶴立雞群嘅王者。
正因為玖紙上月公佈業績後有獲利盤湧現，加上理文造紙業績表現一般，再遇上市況調整，玖紙股價上月23日績後高位10.4元，兩日內直插到9.16元，原來咁就見底，股價噚日唔經唔覺上番10蚊嘅心理關口收市，即係冇跌過。
呢一刻，業績後獲利盤消化晒，市況不再調整，氣氛亦開始返嚟，亦冇同業業績拖累，呢種環境有利玖紙破頂。
港股方面，連美股調整都唔驚，氣氛逐步升溫之下，成交亦會慢慢增加，推高指數，相信短線有條件突破2月高位24216點，再輕微突破月線圖保歷加上軸24466點先見頂。
晉佳
http://fb.com/advanceguy1