因為今次特首選舉贏得唔少同情分嘅新民黨主席葉劉淑儀，似乎已經收拾心情，皆因葉劉噚日公佈佢嘅新活動，歡迎大家參加。不過唔係摘葡萄，而係採茶，名副其實趁「茶葉成熟時」收割。呢個活動係葉劉苦心經營嘅海上絲綢之路搞嘅，下個月22至23日到深圳東部華僑城四季花田、茶溪谷，會員價600蚊，唔係會員就1,000蚊。
協會嘅宣傳話呢次係「一帶一路」嘅茶文化體驗之旅（採茶都同一帶一路有關？），參加者可以親身體驗採茶、炒茶樂趣，仲可以將製成後嘅茶葉帶返屋企品嚐，行程住四星級酒店，但活動冇講明葉劉會唔會現身，葉劉嘅粉絲要注意嘞。
遭中央放棄嘅葉劉，仲繼續為國家事業作貢獻，所以話邊個可以話葉劉冇擔當？佢嘅不忿又係好合理嘅！