快活谷對唔少華人練馬師嚟講都係主戰場，何良係其中之一，今晚（8日）跑到第三場四班一哩，佢以初配硬漢子郭能的「聚歡笑」報捷而回，取得個人雞年谷草第一Win，可喜可賀！
四歲馬「聚歡笑」連同今仗季內七戰三冠一季一殿，表現大熟大勇，呢次單Win及組合獨贏A2分別派59.5及15.5元。此駒服役暫得三捷，三次都係由外籍大師傅勝出谷草一哩，餘下兩次鞍上人分別為蘇兆輝及杜滿萊，可謂馬有馬性及路有專長。而何良、郭能以「赤兔寶駒」進軍打吡前夕，先憑「聚歡笑」攜手建功。
上次「聚歡笑」在蘇狄雄胯下出擊跑第三輸少少，今趟不再用狄狄仔而換上郭能，「聚歡笑」從第10檔起步留住跑居後，末段沿外叠望空全面展開衝刺，結果以短馬頭位力壓外側都追得好勁的落飛馬「沙角威龍」勝出，至於「沙角威龍」影相飲恨做二奶，未能為練馬師李易達向16Win畢業行近一步(暫時他得11Win)。
何良指「聚歡笑」雖然不是高班馬但好忠心，自從表現踏上正軌後甚少大敗，而且此馬個性特別，喜歡從外面衝刺，所以排10擋影響不大。何良又幽默地說「聚歡笑」馬主有運，因為莫雷拉的座騎「綽綽有餘」退出了，才順利取勝。
第三場三、四名分別為大熱門「肇慶威威」及「妙感」，四重彩派5,520元。