近排中資企業狂搶港地，市場口痕友即刻笑住話，往後本港大型發展商，可能要「恒隆化」做收租佬。噚日同恒隆（101）董事總經理陳南祿（Philip）、太子爺陳文博（Adriel）坐低傾偈，佢哋都無奈話，真係點諗都諗唔掂中資點計到數。
不過Adriel話，恒隆做收租佬都唔錯，舊年生意保持到77億，日前賣埋君臨天下最後一個單位後，只剩浪澄灣60幾伙，同藍塘道豪宅單位，年內或者慢慢搣，即係善價而沽喇。
託日本朋友代購
難怪Philip可以印印腳，仲話4月會飛去東京睇前披頭四（The Beatles）成員保羅·麥卡尼（Paul McCartney）嘅演唱會。佢話Paul已經七張幾，往後再睇到呢類經典歌手嘅機會買少見少，所以早前拜託日本朋友預訂門票。佢講笑話，聽日本演唱會，最好搵當地人代買，因為會較快，問到一張門票幾錢，佢只係話好貴好貴，叫華華自己check吓。
當年薪逾3,000萬嘅Philip都話貴，華華好奇按入訂票網check吓，票價14,000至18,000日圓連稅，折合港紙最靚位1,200蚊左右，相比早前黎明最貴1,680蚊，似乎物超所值喎。
Philip又自爆，辦公室有盒印章，刻上過癮字眼，其中一個係「不知所謂」，問佢會印喺乜嘢地方，佢就笑而不語。