民主黨下周五（17日）舉行22周年黨慶，3個特首候選人都應承出席，胡國興最畀面，酒會晚宴直落；林鄭只去酒會；薯片叔未覆實去酒會定晚宴，當然唔少得入唔到閘嘅葉劉淑儀啦。
查實民主黨黨慶同時係一年一度籌款重頭戲，今年目標係籌至少600萬，700萬就更好。因為想嘉賓當晚玩得盡興啲，所以取消咗拍賣環節，𠵱家由籌款專員李華明等四出「揼心口」搵善長仁翁，好似恒地執董黃浩明會捐一箱法國紅酒畀民主黨。至於特備節目，民主黨就賣關子，只透露會搵議員粉墨登場拍片。
查實梁振英上台後盡顯方丈本色，先後下令官員杯葛民主黨同自由黨黨慶，白鴿黨上年黨慶只得政制及內地事務局局長譚志源代表政府出席。
陳維安入埋黑名單
今年一男子可能冇下旨（而查實佢都過氣啦……），至今有3個問責官員同5個高級公務員應承出席。民主黨一如既往冇請曾促請下台嘅官員包括689、陳茂波同吳克儉，今年黑名單仲多咗個立法會秘書長陳維安，因為不滿佢處理立法會議員宣誓事宜喎。