主打年輕人、走大眾化路線嘅UNIQLO姊妹店GU本月31日進駐香港，先喺尖沙嘴美麗華商場開第一間，翌日再喺銅鑼灣皇室堡開多一間。從東京總店親身嚟港坐鎮嘅GU香港首席營運總監小倉慎司話，一定要開一間香港人嘅店，一切香港人優先，更破格為港人設計紀念時裝喺開幕日首賣，佢哋每星期都會喺東京引入最潮服式嚟港，仲會將部份第一線產品喺香港搶先賣，再回流東京。
小倉慎司一直負責海外店，首次離開日本來港長駐，指香港資訊發達勝日本，選址香港可將品牌國際化，佢喺香港已經住咗兩個月，感覺「exciting」，大讚香港好有活力，港人又鍾意講嘢，喺時裝店觀察，顧客同店員講到雞啄唔斷，同日本好大分別，又話香港女仔好有潮流觸覺。