當家小生花旦佘詩曼、胡杏兒、楊怡、林峯及鄭嘉穎……噏得出個名都離晒巢，個個北上搵人仔，有收視保證嘅……走晒……撞正大台台慶50周年，一次過拍幾套大製作，梅小青嘅《宮心計2之深宮計》、重頭劇《誇世代》、《溏心風暴3》，大台爆出「搶人潮」，當中以陳豪最多人爭!!!
昨日有周刊指，陳豪呢次有啲為難，夾咗喺珍姐同梅小青之間，話晒梅小青同劉家豪多年嚟都力捧陳豪，據知一年前已籌備拍《溏心3》，搵咗夏雨、李司棋同關菊英出演，仲叫埋陳豪，陳豪當時都應承，不過有傳曾勵珍出手，知道《宮心計2之深宮計》同《溏心風暴3》喺差唔多時間開工，佢又出一套《誇世代》，仲攬晒啲視帝視后，有歐陽震華、田蕊妮等，仲有江美儀，又搵咗張衛健喺3月尾返嚟拍《大帥哥》。
報道又指，陳豪捲入大台內鬥，無奈決定拍《誇世代》，亦有唔少大台藝人檔期被hold，搞到梅小青要搵外援，好似《溏心3》搵唐文龍、Yumiko、苗可秀等；《深宮計》就要搵劉心悠、周秀娜、羅霖、張慧儀等，就知大台幾唔夠人用!