唔少新股肯捐100萬元畀公益金買個靚冧巴，噚日主板上市嘅IT公司美高域（1985）就用公司創立年份1985年嚟做上市編號，股價一開市就升穿4蚊，較招股價高2倍，收市仲可以「保4」，唔怪得主席朱明豪喺上市儀式上話對公司股價有信心喇。
同樣以創辦年份嚟做上市編號嘅，仲有周大福（1929）、太古地產（1972）等。另外，亦有啲公司鍾意用上市年份做冧巴，例如石四藥（2005）、錦江酒店（2006）、碧桂園（2007）、浩澤淨水（2014）、浙商銀行（2016）等。除咗用年份之外，過去亦有公司為好意頭而捐錢換冧巴，如永利澳門（1128）同置富（778）。