人氣韓劇《鬼怪》兩位男主角孔劉同李棟旭因為劇集帶挈，令佢哋事業再闖高峯，更食住個勢展開亞洲巡迴粉絲見面會，當中李棟旭率先宣佈於5月3號喺九展開見面會，門票今日公開發售。
不過好兄弟都冇情講，噚日孔劉趁李棟旭門票開售前夕，宣佈於5月6號喺亞博舉行「2017 Gong Yoo Live in Hong Kong」，門票將於今個月24號公開發售，大搶好兄弟嘅人氣。《鬼怪》兩大男角相隔三日先後開騷，即時令港迷陷入進退兩難，到底兩個都捧場定係只能揀一個？不過粉絲就關心到底佢哋會唔會互相撐場，做對方見面會嘅嘉賓，重演《鬼怪》中嘅HeHe場面。
李棟旭開直播
而大後日喺首爾開見面會嘅李棟旭，為照顧撲唔到飛嘅粉絲，前日就特別開咗V Live直播頻道，預告直播見面會情況。另外，《鬼怪》開播時港迷已可以喺Viu同步追劇，nowTV買咗收費電視嘅播映權，但免費電視播映權就畀5月中開台嘅奇妙電視搶咗，據知奇妙計劃喺5月底嘅黃金時段播出，仲會搵自己藝員李麗珊等錄廣東話主題曲。
撰文：馮仁昭