心地好、人自然靚，周慧敏（Vivian）正是最佳例子。Vivian近年較少出現在幕前，不過慈善公益方面卻不遺餘力，希望用生命影響生命。早前跟宣明會去到印度加爾各答探訪，又到了當地街市買餸體驗民情，令身邊經常有人照顧的她感受很深，「當你睇自己好細，就會睇到人哋需要多咗，我會更加睇到自己責任。」
統籌：林妙萍
造型、撰文：陳蔚渝
攝影：周樂恒
髮型：Nichol of HAiR
走訪過不同貧窮國家，但這次探訪印度加爾各答，是周慧敏首次接觸貧民窟，除了了解當地家庭貧窮情況、童工問題，又到了德蘭修女故居。
與助養囡囡見面
其中Vivian印象最深刻的，是與《尋找他鄉的故事》中的主角耀榮見面，當年電視中的小弟弟已長大成人，讀完書並有自己的人生計劃，令她見面時很激動。另外又接觸了不少受助個案，「我記得探訪一個男仔，五歲就要做童工，每日喺車房做十個鐘，薪金係港幣個幾，我好開心佢參與咗街童項目，可以讀書有自己職業，我問佢有乜夢想，佢話想做好人，因為得到宣明會幫助，所以佢𠵱家免費幫小朋友補習，仲話如果第日加薪會助養小朋友，我好感動，呢啲就係生命影響生命。」
探訪的開心時刻，莫過於是與自己囡囡加加見面，「我喺2015年助養佢，今次見到佢同相入面已經好唔同。每年聖誕、新年某啲特別日子，我都會收到佢嘅來信同相，我記得佢之前提過如果有一日可以見到我，想同我玩遊戲，我一路記喺心，今次帶咗層層叠同佢玩，佢爸爸媽媽都有一齊玩，好開心過咗一個下晝，都唔捨得走。」
9蚊印度買到乜
Vivian又去了體驗民情，「所以我想知九蚊喺印度街市買到乜，嘩！原來有好多。佢哋見我係外國人已經收貴咗，我買到三隻雞蛋；半斤米、兩斤薯仔，其實已經好多，所以少少行動，對當哋人係好大幫助，係我哋想像唔到。」
分享探訪經歷時，Vivian笑說每次都是吸收靈氣的好機會，「我哋做藝人，成日都有人保護你照顧你，有時去探訪對我嚟講係心靈洗滌嘅機會，我可以放低藝人身份，每次返嚟我都更有力量喺生活當中承擔多啲，同埋會冇咁執着
用工作自我增值
近年主力公益的Vivian，已有一段頗長時間沒有與香港歌迷見面，「好多朋友都等緊我，問我幾時會做騷，我都唔敢答，我想落實少少，應該唔會反悔先公佈，可能性都大，因為我覺得唔可能永遠有魄力做表演工作，到咗呢個階段，好多可以令好鍾意我嘅朋友開心嘅機會，我能力應付到都唔想錯過，如果有合適場地同時間，都好期待有個好close嘅音樂聚會。」
雖然不屬多產，不過Vivian認為保持工作才能與社會接觸和同步，「令自己唔脫節好重要，令自己能夠有adjust自己嘅能力，可以吸收同增值，都係一種動力。」問到可會再接拍電影？「呢個係一種機遇，我唔會特別plan，其實我手上都接咗一啲劇本，有電影、舞台劇，暫時都未有時間睇。」
49歲凍齡秘訣
49歲的周慧敏（Vivian），經常被大家稱為凍齡女神，除了外在保養，她認為心態最重要，「我覺得心情同心態有好大影響，保持寬容或者正面態度都會好好，舉例我係一個藝人，面對工作心態，係想建立友誼而唔係競爭，對於工作上整個氣氛、過程都會更投入，會更加開心，𠵱家我係呢種心態。」
更多精采時尚內容，盡在 http://add.appledaily.com 。